أرفض أن أكون للاستخدام!!

في مدونتي السابقة أتكلمت عن نوعية محددة من الرجال، (مع اعتراضي على التصنيف من حيث المبدأ) واضح إن في خلل اجتماعي في تعريف الرجال (ده غير الخلل الشامل اللي بنعاني منه في مصر(
اللى ياخد باله كويس من وصفي للعرسان يلاحظ 3 نقط مهمين وده بالتحديد اللى كنت عاوزة حد يفهمهولي علشان أنا مش عارفة استوعبه !
النقطة الأولى:
مطلقين ولهم أولاد يعيشوا مع أمهاتهم!!!
النقطة التانية:
انهم بالفعل ميسوري الحال جداً
النقطة التالتة:
إنهم في بدايات العقد الخامس
اللى مش فاهماه أن الشبان (اللى في سن الخمسين) دول اتجوزوا وعندهم أولاد سابوهم يتربوا مع أمهم وهما مرتاحين البال لأنهم طالما بيصرفوا عليهم يبقى الحياة جميلة جدا وكده مهمته انتهت عند هذا الحد... الحاجة التانية، انهم عاوزين يلاقوا واحدة مناسبة ليهم في السن بس تكون من غير عيال؟؟؟ لو لاقوا واحدة لم يسبق لها الزواج في هذا السن... يعني في قولان في هذا الأمر، أو يتجوز واحدة أصغر مع شرط عدم الطمع في إنها تجيب أولاد... ويحرمها من إحساس كل بنت بتتمناه من يوم ولادتها..............
ايه يعنى الموضوع!!!... مش فاهمة؟.. هو كده يبقى شايف انه حقق هدفه من الجواز وجاب عيال من الأولانية وطلقها وكان كريم جدا انه ما حرمهاش من الأولاد وسابهم لها؟؟؟؟ مع تأكيد كلمة انه مش مخاليهم عاوزين حاجة!!! الراجل بقى حر وعاوز ينطلق،، براحته... ويلاقى واحدة تدلعة مش حتفرق بقى في حب ولا مافيش.... بالبلدي كده،، واعذروني في اللفظ عاوز واحدة يستخدمها!!!!!!!!!!! يا مصيبتي....

العريس...!!

الفصل الأول
المشهد الأول
عريس لقطة وزى القمر... مطلق برضة .. مش مهم، عندة بنت... خير تبق أخت لولادي..لا دي مع مامتها فى أوروبا ومش موجودة... المهم هو عاوز يستقر.. نشوفه وماله.
المشهد التاني
الحمد لله حصل قبول... ألف مبروك ، بس لازم فترة خطوبة صغيرة ندرس فيها بعض شوية، ما هو أصل اللى عملها مرة لازم ياخد باله اوى بعد كده.
الأحوال تمام... الأولاد تقبلوا الموضوع بشكل كويس وكمان العريس بيحب الأولاد وده أهم حاجة عندي.... خير خير.
المشهد الثالث والأخير
خلاص بقى بنرتب حالنا على الزواج في أوائل الشهر الجاي... بنهزر ونضحك والحياة حلوة بس يا خسارة والحمد لله كمان ... سمعت كلمة اتقالت عفوية... انتى تحمدي ربنا اني حاخدك بعيالك....
Cut
تمام كده.... كل شيئ نصيب
النهاية

الفصل الثاني
المشهد الأول
راجل كويس وابن حلال وميسور الحال، مطلق وعنده ولد عايش مع أمه، المهم انه عارف ربنا كويس وبتقي الله فى كل حاجة بيعملها .. يعنى حيخاف عليكي ويعامل ربنا فيكي...
طيب والأولاد؟؟ هو ما عندوش مانع .. طيب نشوف
المشهد التاني
ما شاء الله.... طول وعرض... وأخلاق أخلاق....
المشهد الثالث
انتي بصراحة كده عاجباني أوى بس انا عاوزك لوحدك ينفع تودي الأولاد لأبوهم أو لوالدتك....
Cut
تمام كده.... كل شيئ نصيب
النهاية

الفصل الثالث
المشهد الأول
دكتور ومطلق (هي دي الموديلات الموجودة) المهم يكون مقدر وفاهم الحالة كويس...
والله إحنا قولنا كده وهو ما عندوش مانع الأول يشوف (يعاين البضاعة) يادي الغلب ما إحنا خلاص فهمنا الليلة كلها أعمل ايه يعني ماشي الحال أدينا بنضيع وقت ونفتح مواضيع جديدة بدل الملل اللى إحنا فيه..
حيكلمك الأول... وانتو بقى اتفاهموا...
المشهد الثاني
ألو مساء الخير... أنا فلان من طرف الحاجة فلانة... أهلا وسهلاً
عاملة ايه؟
الحمد لله
وانت ازيك
تمام
طيب ...
(نضحك على نفسنا شوية)
افتحي موضوع نتكلم فيه
مممممم أحاول! اسمك وسنك ومهنتك....
وبدأ الحوار.....
المشهد الثالث
ده بقى الحلقة الجاية...

لا تنحني

يقول مارتن لوثر : لا يستطيع أحدٌ ركوب ظهرك .. إلا إذا كنتَ منحنيًا
المقولة دي فكرتنى بنكتة اللى طالع الكوبري يدفع عشة جنيه، وكمان عشرة جنيه لما ينزل من على الكوبري... وقلم على قفاه هدية...
اللطيف فى النكتة الى انا مش شايفاها نكتة ان الوحيد اللى اتزعبب واتنرفز كان بس بسبب ان اللى بيدوا القلم على القفا مش كفاية ودي عطلة للناس....
دي بجد مش نكتة مش احنا اللى وافقنا على الدفع ...
كل يوم يعدي عليا أسأل نفسي نفس السؤال ....سؤال واحد بس...ولادي... حيتربوا إزاي وهما شايفين أهاليهم مطحونين،، لما يكبروا... حيعيشوا إزاي... مش ممكن حيكون في أسوأ من اللى إحنا فيه!! طيب أقدر أعملهم ايه دلوقتى علشان أريحهم شوية لما يكبروا ...
لك الله يا مصر... ولنا الله يا شعب يا مطحون.

وقولولي راجل ولا ست؟

يا ولاد اصحو الساعة خمسة وربع... بسرعة اغسلوا وشكم بسرعة والبسوا وجهزوا حالكم، عربية المدرسة على وصول ....الساعة ستة وعشرة .. الاتوبيس وصل... ما تنسوش تاخدوا مفتاح البيت....
الحق اشغل الغسالة وأوضب البيت واخد حمام قبل ما انزل الشغل
يادي الخيبة برضوا نسيوا المفتاح ... اعمل ايه دلوقتي مش حقدر انزل بدري من الشغل الحقهم قبل ما يوصلوا البيت ، امري لله وأمرهم لله برضه حيضطروا يقفوا على الباب لغاية ما أوصل ونغسل تانى مش مهم...
اهو يوم في الشغل خلص والسلام... نكمل شغل في البيت... مش قادرة اطبخ انهاردة مشيها كشري ولو مالكوش نفس يبقى سندوتشات فول وطعمية... يوه هو كل يوم طبيخ عديها المرة دي ،، أبداً. الحمد لله انى حاملة لقب الأم العزباء من عشر سنين يعنى حرة
حرة في طريقة تربيتى لاولادي ، في أكلهم ، في لبسهم.. في طريقة مذاكرتهم.

بس دول ولاد وداخلين على سن مراهقة... مش حتقدري عليهم بعد كده دول محتاجين راجل؟ لازم تتجوزي.!
أفندم ... اتجوز علشان هما محتاجين راجل... وانا لو محتاجة راجل في حياتى ... أعمل ليه...

وبعدين انا ليا شرط في الجواز... اللى أتجوزه يكون راجل بجد... لاااا انت طلباتك كتير اوى ... ماهم كلهم رجالة.. انتي عاوزة ايه بالظبط؟؟أهو واحد يشيل معاك الحمل وخلاص...
وحتلاقيه فين ده.. هو يعنى كا طالب يتجوز علشان يشيل حمل ولدين مش بتوعه... الموديلات دي خلصت من زمان.

وبعدين ليه العقاب الأبدي ده... هو انا غلطت في حاجة.. ما انا بشتغل وبصرف على الولاد وكافيه خيري شري...
وحياتك وشبابك اللى بيروح انت فين من ده كله؟؟

انا موجوده ومش موجودة...
انوثتى باينة للناس بس انا مش حساها
نفسي احب واتحب
نفسي ارجع القلب الأخضر اللى يرفرف من كلمة ويدوب من لمسة
نفسي اكون أنا؟