الخميس، ديسمبر 14، 2006

أوعى التوربيني.......

أتابع بدهشة فظيعة موضوع العصابة اللى بتخطف العيال وتغتصبهم وتقتلهم وتقطعهم وتدفنهم فى 4 محافظات بيتسموا بالحيوية، حوالى 30 طفل من أطفال الشوارع اللى اتعرف حقيقة قتلهم وما خفي كان أنيل؟؟؟ ده نسميه ايه بالظبط؟ غياب أمنى ولا هطل ولا استعباط، مش عارفة؟
والغريب ان الموضوع يوم عن يوم تتكشف عنه قضايا فساد أكثر شراسة من قتل الأطفال نفسهم... متمثل في دور (أل ايه الرعاية) ومؤسسات (رعاية أطفال الشوارع) والأحداث المنتج الرئيسي للإجرام... ونسمع ونشوف عن تبرعات بتتلم ويصل حجمها لأرقام فلكية وفين بتروح... الله أعلم، وخط ساخن ومولع لنجدة الأطفال؟؟ أطفال مين؟
مش عارفة ليه عندي شك قد يصل إلى حد اليقين لما بفكر ان الحوادث دي وسلسلة قتل الأطفال اللى مالهمش ديه، حوادث مدفوعة الثمن مقدماً لعدة أسباب:
- القضاء على ظاهرة تشوه المجتمع وتظهر عيوبه الاجتماعية
- قد تكون لها علاقة بتجارة أعضاء مثلاً.
ولو فكرنا أكتر حنلاقي أسباب تانية منطقية برضة ، لان ما فيش عقل يقول ان ده مجرد إجرام وشذوذ ومش قادرة استوعب ان يكون في جنان منظم يصل إلى حد القتل 30 طفل (وده لحد دلوقتي العدد المعلوم قد يكون أكثر بكثير لمجرد شذوذ).
انت فين يا حكومة حبيب العدلي من كل ده؟؟ فين المركز القومي للأمومة الطفولة؟؟؟؟ وإغاثة أطفال الشوارع...
الحاجة اللى ممكن افكر فيها بسادية شوية ان العيال دي أترحمت ووصلت لخالقها أطفالا..
لا حول ولا قوة إلا بالله

هناك 15 تعليقًا:

انحلت سيور العربه وسقط المهر من الاعياء يقول...

حكومه؟
امومه وطفو له؟
عا دلى؟
حضرتك قا عد ه فين
الحكومه
اللى اغتصبت البنات والشباب ف المظاهر ات علنى
الحكومه
اللى وقفه ضد العبد لله ومجموعه من اصدقائى الشباب لمنع ترخيص جمعيه
لاطفا ل الشو ارع

هى الحكومه دى اللى حتحمى النا س والاطفال

والنبى حر ا م عليكى متجبيش سيرتهم تا نى
اصلى
مش ناقص
هههههههههء
حكومه
قا ل
تحيا تى

L'orientale يقول...

عزيزي،اسفة بجد للتجربة الأليمة اللى انت مريت بيها ولازم اعتذر لاني مهما قلت أو عملت مش حيكفي دقيقة يههان فيها رجل شريف بيحب مصر، ولا أستطيع ان استهين بمعاناة الرجال أمثالك من العذاب والبهدلة في بيت الحكومة.،

انا مش شايفة إني بنصف الحكومة علشان تقولي انا قاعدة فين انا معاكم هنا وحاسة بكل الضغوط والعذاب عليك وعلى زمايلك وعليا انا كمان، لكن سؤالي وهو ده اللى عاوزة أعرفة... الناس ليها دور مهم بعيد عن الحكومة واللي بيقدر يعمل حاجة ويبعد عن الشر... اكيد حيغني.
وبعدين جمعية ايه اللى عاوز تعملها دي هى ناقصة جمعيات... ما هى مرطرطة في كل حته... وبتطفش العيال من سوء المعاملة وبيموتوا فيها من سوء التغذية والقذارة والأمراض وقلة الخبرات المطلوبة لأنها مكلفة جدا وعاوزة تمويل جامد. وناس تقدر تتعامل مع هذه الفئة من الأطفال لان التعامل معاهم صعب جداً
أنا مش بشكك في عزيمتك ورغبتك في الأحسن ولا بشكر الحكومة اللى بتعمل عكس واجبها!! انا بس بسأل إلى متى؟؟؟

غير معرف يقول...

اورينتال

بحاول اعلق عندك ومش عارفة خالص
بس عايزة اقولك ان اولاد الشوارع مشكلة لها فروع كتيرة
ده لوبى كبير بيدور فى حلقة مفرغة واللى بيدفع تمنه ولاد الشوارع واللى بيكسب منه الجمعيات المتبنية الفكرة
والنتيجة مش لصالح اى حد فى المجتمع
النتيجة مجموعة مرضى وجرائم سادية
وداخلية تعتمد على الصدفة لاكتشاف الجرائم
هذا هو الحال
تحياتى
توتا

Scorpio™ يقول...

اوريونتال
بشكرك عالموضوع
انا بجد زهقت
امتى هايحصل التغيير بقى
ولكي تحياتي

غير معرف يقول...

عزيزتي ...
بغض النظر عن موضوع القاتل المسمي بالتوربيني و سواء كان ضحية آم مجرم معتاد الإجرام ... سواء كان شاذ جنسيا أو سادي و دة طبعا لأننا معندناش من أساسة حاجة اسمها ثقافة جنسية ... و بغض النظر عن انة محكوم علية مسبقا او انة حيلبس كل القضايا قتل الأطفال او الي ضحيتها اطفال سواء ذكور او اناث من جرجا الي مطروح ( يعني عملية تقفيل ملفات البوليس فرصة لقينا حمار يلبس الملفات المفتحة ) ارفض ان اسميهم اطفال الشوارع ... طفل الشارع هوا من نزل الشارع بارادتة و صاع فية ...أما دول يطلق عليهم اطفال ضالة حيث انة موش عارف الصح من الغلط ... حيث انة ضحية اب او ام اما مدمنة او مدمن او بياع بانجو ليصرف او تصرف علي ادمانها او غالبا طفل خطيئة ..او لقيط او الي اخرة ... فبالتالي هو اصلا ضال لا يعرف الصح من الغلط و غالبا بيبقي حتي لو تاة ما بيعرفش يرجع بيتة تاني ... او لو وضعوة في ملجاء بيهرب منة و السبب بسيط موظفة الملجاء بتاخد 150 جنية شهريا و طلعان بوز امها مع شوية صيع من وجة نظرها طبعا او ولاد حرام كما يسموهم ... طب و هما ذنبهم اية في انهم
ولاد حرام يعني كان يطلع من حيوانات ابوة المنوية و يقولة كدة عيب ... و لا كان يخش لبويضات تلقيح امة و يقولها متعطيش حتحبلي و تجيبي طفل ضال و في الاخر تسيبية في الشارع ... كثير من اطفال الضالين و كذلك اطفال الشارع هم ضحية فقر او مجتمع مودرن ... يا سبحان الله فقر و مود رن أذاي ... ساعات تلاقي في وسط الأولاد دول عيال سكر و شكلهم و تقاطيعهم حلوة موت ... دول بقي ماما كانت طالعة من مارينا نزلت علي فيفي في بيانكي ضربوا كوزين بيرة علي نفسين حشيش عديت بقيت الشلة طاحوا في بعض محدش عارف مين كان نايم مع مين ... (2 ) بقوا اخر الصيف حبلي ... نعمل اية ... ( الي في البيت موش واخدين بالهم انها اصلا موش حامل لا انها اصلا ما قديتش الصيف معاهم ... موش مهم يعني حتروح فين ... مع صديقاتها ... و نعم الاصدقاء المهم ظلتت العيل و هو حتة لحمة حمراء ... و علي اول باب جامع تسيبة ... او فقر .. يا ابوة بياع بانجو ليصرف علي ادمانة ... يا امة من واقفات شارع الهرم او جامعة الدول ... و محدش حاسس بحد يا.. يا.... يا..... إلي آخرة ...الطفل من دول لما بينزل الشارع .. دي بقي في حد ذاتة امبراطورية ... يا بيصطادهم واحد يشغلهم شغالات و دي قمة الرحمة حتي لو كان او كانت عند ست ما بترحمش او جوزها غاوي عيال صغيرة برضة ارحم من الشارع ... او بتوع التوزيع ... اكيد موش بتوع توزيع جرايد ...طبعا هيروين و حشيش ...او بتوع التسول ... و غالبا ما بيعمل في العيل او العيلة من دول عاهة ( علشان الايراد يكتر )...او بقي يقعوا فريسة للاتجار بالعضاء و دة بقي ماقولكش سوق و لا سوق التحف و السجاد العجمي اجدع من سوق الهيروين نفسة بس المهم جوز طلبة مكروشة من كلية الطب علي 2 تمارجية علي طربي علشان يدفن باقي الاعضاء الغير مستخدمة يعني موش حيبيعوا رجل و لا زراع ممكن لطلبة طب للتشريح الاهم يكون لية اتصالات خارجية بمافيا تجارة الاعضاء و معمل لتحديد الفصائل ( يعني الموضوع موش بالساهل لا دة مكلف نوعا و لازملة حماية و حراسة من نوع خاص و لية حصانة اقوي و اكبر من حصانة مجلسي الشعب و الشوري )... و عموما كلهم اسواء من بعض
... و غالبا نتيجة لان معظم ضباط الشرطة بيسيبوا الموضوع دة للصولات او امناء الشرطة ... فبيفتروا علي العيال دي كفاية ان واحد فيهم يشوف عسكري يعملها علي روحة .... بصراحة شديدة احنا الي بنخلق المجرمين في مجتمعنا في هذة الصورة ... استغل هذة الفرصة لكي احي الفنان : احمد السقا علي فيلم تيتو... فهو اول من واجة هذة الظاهرة ( حاليا ) و ازاي العيل من دول او البنت من دول بتنحرف و كيف يتعامل معهم المجتمع و كيف تكون نهايتها ... كذلك الفنانة : حنان ترك في مسلسل اطفال الشوارع ...و كيف كانت تعاملهم مديرة الدار او الملجاء و كيف كان يعاملهم الضباط في الاقسام ... كثير مننا لا يعرف ماذا يدور داخل القسم مع هولاء الطفال ... كفاية اني اقولكم انهم ممكن يلبسوا جرائم معملوهاش بس علشان ملفات تتقفل و النتيجة الاحداث و طبعا بيتخرج من الاحداث موصوم بوصمة العار او غالبا دة لو عاوز يتوب بيبقي جعلوني مجرما للراحل فريد شوقي ...اما لو بقي ربنا كرمة جوة و دة غالبا الي بيحصل بيطلع من جوة اية اوعي وشط يا مزور يا هجام يا مغتصب يا... يا.... الي اخرة ...
يا جماعة الفقر موش عيب لاكن لازم نواجهه لعدة اسباب اولها الفقير الي عايش في حجرة في دور بية 20 حجرة المساكن الشعبية العيال بتطلع مدمرة نفسيا لعدة اسباب ... ابوة نايم مع امة و هما حوالينهم ... الجار بيتفرج علي امة و هي بتستحمي في الحمام المشترك ما بين الدور ...اواد بيشوف اختة و جيرانهم و هما بيستحموا ... العيال نفسيتها بتدمر ... فبدل ما نفتري احنا عليهم نعمل حاجة كمشروع قومي للناس دول ... ما نستناش الحكومة و لا الداخلية و السبب بسيط هما موش فاضين هما عندهم الي مكفيهم ... يا بيحرسوا الريس يا سكان المعادي و الزمالك ... يا بيهربوا واحد لطشلة كام مليار يا بيسفوا حسابات داخلية لبعض رجال الاعمال وقفوا ضدد بعض الكبار( بيصوروهم يعني افلام سيكو سيكو )
...فكتر خيرهم يعني حيعملوا اية ... ولو فية فينا جاهل سولت له نفسة بالسؤال اية الي كانوا بيعملوة قبل القبض علي المذكور بالتوربيني و عصابتة ؟؟ ببساطة شديدة ... كان الضابط بيكت انة نتيجة لتحرياتة ... الطفل او الطفلة مالهاش اهل ( ولدت لوحدها ) و انه من معتادي التسطيح علي القطارات ( بيحب يتفسح بين المحافظات راكبا ظهر القطار ببلاش ) موش حنسال اين الامين الي بيبقي جوة كل قطار ... و يا حبة عيني اليوم دة نام حلم حلو كويس اتقلب فوق سطح القطار وقع ... ضربة القطار الي جاي في الوش ... قطع حتت صغنونة غنونة ... مات ... بس خلاص ... لا نيابة و لا طب شرعي و لا البية المامور يقولي عندك ملف مفتوح متقفلش لية ...و يعني هو لية حد يسال علية و لو لية ادينا خلصناهم من بق مفتوح كانوا باكلوة ... والله لينا الجنة ... و بعدين حركة الترقيات نازلة قريب فنلم الدور ...بص خلاص
عزيزتي اذا كنتي بتسالي اي حكومة العدلي ... فهي تحرس موكب الرئيس و السادة الوزراء ...وضيوف المملكة المصرية العربية ...المركز القومي للطفل ...دة موش لاطفال الضالة او اطفال الشوارع ... دة لاطفال جاردن سيتي و الزمالك و كفر عبدة و مارينا ... اية عاوزة تودي طنط سوزي تفتحح مكتبة لعيال موش مستحمية او ما بتعرفش تقراء من اساسة ولا اية ...و بعدين المناطق الاخري مافيهاش متبرعين ماديا ....

الزعيـمة يقول...

هما اطفال الشوارع عصابة جناة ولا مجني عليهم ؟

لما تمشوا فى وسط البلد وتتفرجوا على العيال دي ماشيين ولا نايمين شكلهم زي صفائح النفايات حتحسوا بوجع فى ضمير هذا الوطن


قبل ما نسالة عن الجناية والجانى شوفوا هو الاول جانى ولا مجني علية

اطفال الشوارع جريمة مجتمع

الأغاني للرأفتاني يقول...

انا كنت عايش فى اسكندريه قبل ما اسافر..
لو حضرتك تروحى نفق محطه الرمل..او ظهر فندق سيسل فى المنشيه..هتشوفى كم عدد هؤلاء الاطفال..
وانت عارفه قسم الرمل لما يكونوا فاضين ومفيش زحمه يعملوا ايه؟؟

يقوموا عاملين حمله علشان يلموا ولاد الكلب زى الضباط ما كانوا بيقولوا عليهم..

اقسم لك انى لم اكره مصر يوما الا عندما اشاهد اطفال زى دول..
او عندما اشاهد طفل عنده 6 سنين بيبيع مناديل فى اشارات المروو...

سرقوا براءه الاطفال ونهبوها بظلمهم

تحياتــى من نيويورك

L'orientale يقول...

عزيزي المهاجر... شكراً لمرورك على مدونتي المتواضعة... فعلاً انا كل ما بشوف أطفال في الشارع نايمين على الأرصفة ومتغطيين بهلاهيل قذرة ... قلبي يتعصر وبتمنى اني أقدر أعمل حاجة لكني كتير بخاف منهم لانهم بالمناسبة مش أطفال... وانت وكل الناس وأنا عارفين السبب، المهم الشرطة في خدمة الوطن وتأمين النظام والسادة الكبار... لكن المخلوقات دي لا تنتمي لهذا اللفيف بل هي مخلوقات...... وخلاص.
تحياتي

L'orientale يقول...

Tazart
أسعدني تشريفك لمدونتى وشكرا لمرورك
معك حق، الجريمة لا تعرف وطن موت الضمير يقتل شعوبنا...
وسيستمر فلا مفر...

الأغاني للرأفتاني يقول...

كل سنه وانت طيبه وبخير
عيد سعيد وعام حديد كله خير وسعاده

الأغاني للرأفتاني يقول...
أزال المؤلف هذا التعليق.
الأغاني للرأفتاني يقول...

Bonjour
j'ai juste voulu dire bonjour. j'espère que tout va bien

merci

L'orientale يقول...

المهاجر المصري
Bonjour Chéri,
je remercie ton bon sens, et ça va, tous vas bien, mais malheureusement j’ai perdu ma mère la semaine dernier juste après la fête, c’est pour cela j’ai plus de mots a dire….
Mais sûrement je passe chaque jour chez to page, c’est comme l’addiction.

الأغاني للرأفتاني يقول...

cher freind je suis si désolé pour votre perte pourquoi le yout ne m'a pas indiqué ainsi je vous appelle ou fais n'importe quoi vous soutenir que un dieu bénissent son âme veuillez rester en contact et si vous avez besoin de n'importe quoi, m'envoie un email. je viendrai bientôt, et je voudrais vous rencontrer. je suis si désolé

غير معرف يقول...

الموضوع كله فبركه فعند ظهور عائلة التوربينى فى برنامج الحقيقة على دريم وشرحهم لحالته العقلية واثارت بعض التساءلات حول ما يحدث يءكد ان حكاية التوربيمى ليست الا كموضوع متخلف الصعيد الى قالوا انه قتل وشوه الجثث وكلنا عارفين انه موضوع كبير الغرض منه سرقت الاعضاء وبرضه موضوع التوربينى هو محاولة لايجاد قاتل لرمى التهم عليه وما خفى كان اعظم