إعادة حياة – Re-Life

ساعات بتقرف اني موجوده لسة في الحياة دي بالشكل ده، وبتمنى يكون عندي القدرة اني أعيد حياتي مرة تانيه، مش رغبة مني في استمرار الحياه اد ما هي خيبه قويه انا حاسة بيها.

مش اللي بيسقط في المدرسة او الجامعة بيعيد السنة؟؟ انا حاسة اني سقطت في آخر عقدين من عمري، وعاوزة اعيدهم تاني بشكل تاني مبني على خبرات وتجارب ونجاحات وفشل ودموع وصريخ وضحك وحب ومحاولات حب ومحاولات ارتباط.... حاجات كتيير اوي اتعلمتها ومن حقي كأنسانة اني اصحح بعض الامور اللي وقعت فيها ومنها اتعلمت...

وبما اني سنجل مازر، فا تقليب المواجع ده كله بيحصل كل يوم وبيزيد في اوقات محددة لما اكون بجد محتاجة أعمل حاجة ومش عارفة اعملها،  لاني محتاجة "ضل" راجل في موقف معين اسند عليه، فجأه كل المعارف والاصدقاء والمقربين... بح، يانهار اسود!!!  والوجع الاكبر بيكون نتيجة الناس اللي وقفنا معاهم في اوقات شدتهم.... ليه كده يا غجر؟؟

طبعا لاحظتوا اني ما جبتش سيرة اخ ولا اب ولا عم ولا خال... انسوا، دول من اسباب خيبتي التقيلة

وعارفة مقدما كويس اوي لو حبيت اعاتب حد، حيقنعني بمليون طريقة ان والله غصب عنه انشغل وظروف قهرية احالت دون وجوده جنبي وانه لايمكن يقصد انه يتخلى عني لولا الظروف الخرائية اللي مر بيها الاسبوع ده بالتحديد..... والكثير من الهري الهري الهري.

حتقولولي ايه علاقة ده بأني اعيد حياتي مره تانية؛ اقولك يا ستي، ويا سيدي...

·       علشان اهم حاجة اتعلمتها اني مش لازم اثق في كل اللي حواليا، مهما كانت مواقفهم معايا، حبطل "عشم" اه والله حبطله...

·       مش عاوزة أقول اني حكون انانية، بس حكون...  معلش بأه حاخد بالي من نفسي اكتر، ومش حاجى على نفسي علشان اي مخلوق

·       كل حاجة اجلتها علشان الوقت مش مناسب او علشان عندي شغل أو علشان اي قصة خرافية .... حعملها في وقتها

·       حمارس النفاق كما تعلمته ... صدقوني بينفع جدا

·       وبما اني شفت القسوة بكل اشكالها، مافيش مانع استعملها "مع انها ضد طبيعتي" بس اللي اتلسع من الشوربة ينفخ في الايس كريم

·       حعمل حسابي اني في المستقبل مش حقول ياريتني كنت عملت ده وماعملتش ده... مانا اتعلمت بأه

·       وحتجوز... مش حفضل الام المعيلة اللي شايلة هم الدنيا على دماغها وفاكرة اني حقدر على كل حاجة، انا مقدرتش الحقيقة، واتعلمت ازاي اقدر

ببساطة.... عاوزة اعيد الـ20 سنة اللي فاتوا ... بس كده 

عليه سلام

عليك السلام منك
وعلى من حولك الحذر
ورضيت انت عن نفسك
فلم ترى سواك بشر
.
.
.
فلا سلام عليك ولا رضى
فانت في عيون غيرك لا شيء سوى كبر
.
.
.
ترى الناس صغارا
ولا تعلم .... انهم سيدهسونك بالجزم

مسكين انت

تعلمت معنى العشق عند اعتابي
وضعت أمرك تحت تصرفي لأقبلك
تحملت حماقات طفولتك
وصراخك دوما بأن كرامتك تملي عليك ثورتك

رفضت ألا تكون إلا أنت.... ,انت لاتعرف من أنت وماذا تريد

كنت اصرخ بداخلي وانت .... تعلو ضحكاتك من نشوة انتصارات زائفة

تزرف دمعا يوم أن شعرت انك تخسر معركتك لإمتلاكي

استجديتني ان اساعدك
ان اتغاضى عن تفاهاتك
ان استقبل غيرتك بمحبة وود

مسكين أنت !!

كرهت صراحتى
لم ترى في غير إمرأة تسعى لامتلاكها
انكرت عليا حقوقي في احتفاظي بذكراتي
فأنا اليوم بلا ذاكره حتى تفخر بأنك مليكي

اليوم كبرت
وفهمت بعد ان حطمت اسواري، واقتحمت حياتي
انك كنت مجرد طفل

تحبو أمامي في ضعف
تعترف انك برغم حبك خنتني
وانك ببساطة ... مازلت تحبني

تعتذر وترجوني أن اعفو
تتظاهر بقوة انا اعلم جيدا انك لا تملكها

مسكين انت

فأنت خارج حياتي من اللحظة

فقط لاأني أشفقت عليك

بمجرد شعورها بهذا الدفء الغامض الذي تسلل إلى أعماقها ليداعب آلامها
أغلقت عينيها وتنهدت بهدوء..
في ذاكرتها حضن امها وكيف كات تشعر بأنها مازالت هذا الجنين المغلف بماء الحياة.. وتدللت أكثر بافتعال النوم... فهي تعرف ان أباها سيحملها بحنان بالغ بين ذراعيه القويتين ليودعها سريرها .. كم تعشق احساس القوة الذي تستمده من والدها، فهو فتى احلامها ولاتريد سواه ليحميها ويفخر بها.
يطبع قبله حانيه على جبينها ويتمنى لها ليلة سعيدة...
احتضنت وسادتها بقوة وتذكرت حرب الوسادات بينها وبين أخاها، كان يصالحها إذا ما غلبته قوته اثناء لعبهما .. ويستدر عطفها إذا ما غضبت منه.. ويأتي إليها بعصير التفاح المفضل لديها ليغريها باللعب معه مره اخرى مع وعده انه سيكون اكثر حرصا ، ووعد آخر بأن يأخذها معه في نزهه
يالها من حياة ناعمة تنعم بها فتاه شرقية
.
.
.
.
تنهمر دموع حارة تلهب وجنيتها...
فأمها لم تحتضنها أبدا، كيف وهي لم تدلل ابدا
ولم يحنو عليها أبوها في يوم ما فقد اختار لها اسم ولد قبل ان تولد
وكرهها أخوها لانها..... ليست مثله

سؤال

هو: أين أنت ؟

هي: انا هنا.... معنديش مكان تاني

هو: كل الكون لك

هي: اتمنى لكن أحب ترك مساحة للغير للتحرك، يارب تكون بخير

هو: بخير

هي: أعترف اني في قمة ضعفى النفسي

هو: إذن، هى اللحظة المناسبة . . للاستسلام !

هي: عمري ما استسلمت وما يزيدني ضعفى إلا قوه وعناد وهذا ما يزيد من شقائي.. :(

هو: فأنت فى قمة قوتك!

هي: المخيفة للرجال؟؟؟؟؟؟

هو: الضعفاء منهم

هي: اطمأنيت.... يحيا الرجل الواثق


هو: والمرأة البديعة

والله نفسي احكى واحكى من قلبي وأصرخ لغاية ما آخر واحد فيكي يا دنيا يسمعنى... مش تعب ولا مرض بس ذل العيشة والمسئولية خلوني بفرفر.. نسيت انا مين وعاوزة ايه نسيت اني انثى وفاكرة انى أم ولازم أكون أب،
ولادي ربنا يبارك فيهم زي الفل والحمد لله مقدرش أطلب لهم غير الستر ويرزقهم من وسع...
بعتب على الدنيا والناس اللى ما بقوش ناس... غصب عنهم كله ملهي فى حاله وكله عاوز حاجة وناقصة حاجات... تسأل ماتلاقيش إجابة أو ممكن يفكروا ويردوا بهبل... فلوس يمكن ... تفتكر تسعد؟؟؟؟
انا بقول نفسي ألاقى حد يحسسنى اني إنسان... بشر.. لحم ودم وإحساس..زيي زي كل البني أدمين.. بالأخطاء مليانين وللحب والإخلاص مشتاقين... مش مهم ناكل ايه ولا نشرب ايه ... عاوزين نحس بأيه..
عاوزة احس إني مهمة في قلب إنسان تاني، عاوزة أحب بكلي واتحب للآخر... من غير حسابات ولا بكام ولا على مين...
من غير مايشوفني مطلقة وأم وولدين ومدارس ودروس واكل وشرب وعيا ودكتور... وعلاج ورباية وجامعات بألوف..
شوفني إنسان وحبني إنسان ولو كرهتني، أكرهني ظروف..
انا بنى أدم ، بشر، مش ملاك..
عندي اللى عندي ومين ما عندوش ألوان
لون غامق وفاتح ويوم تعمل لوحات...
لولاش الطين والفحم ما كانش ابدا الماس.....

اسكنتني نفسي لاحميها
وفرضت حصارا على جسدي
وحرمتني التفكير في قلبي
فهل اتطلع لاقتحامي
حيث لا سبيل ولا مفر
هل سأستسلم؟
هل سيفهم؟

أوعى التوربيني.......

أتابع بدهشة فظيعة موضوع العصابة اللى بتخطف العيال وتغتصبهم وتقتلهم وتقطعهم وتدفنهم فى 4 محافظات بيتسموا بالحيوية، حوالى 30 طفل من أطفال الشوارع اللى اتعرف حقيقة قتلهم وما خفي كان أنيل؟؟؟ ده نسميه ايه بالظبط؟ غياب أمنى ولا هطل ولا استعباط، مش عارفة؟
والغريب ان الموضوع يوم عن يوم تتكشف عنه قضايا فساد أكثر شراسة من قتل الأطفال نفسهم... متمثل في دور (أل ايه الرعاية) ومؤسسات (رعاية أطفال الشوارع) والأحداث المنتج الرئيسي للإجرام... ونسمع ونشوف عن تبرعات بتتلم ويصل حجمها لأرقام فلكية وفين بتروح... الله أعلم، وخط ساخن ومولع لنجدة الأطفال؟؟ أطفال مين؟
مش عارفة ليه عندي شك قد يصل إلى حد اليقين لما بفكر ان الحوادث دي وسلسلة قتل الأطفال اللى مالهمش ديه، حوادث مدفوعة الثمن مقدماً لعدة أسباب:
- القضاء على ظاهرة تشوه المجتمع وتظهر عيوبه الاجتماعية
- قد تكون لها علاقة بتجارة أعضاء مثلاً.
ولو فكرنا أكتر حنلاقي أسباب تانية منطقية برضة ، لان ما فيش عقل يقول ان ده مجرد إجرام وشذوذ ومش قادرة استوعب ان يكون في جنان منظم يصل إلى حد القتل 30 طفل (وده لحد دلوقتي العدد المعلوم قد يكون أكثر بكثير لمجرد شذوذ).
انت فين يا حكومة حبيب العدلي من كل ده؟؟ فين المركز القومي للأمومة الطفولة؟؟؟؟ وإغاثة أطفال الشوارع...
الحاجة اللى ممكن افكر فيها بسادية شوية ان العيال دي أترحمت ووصلت لخالقها أطفالا..
لا حول ولا قوة إلا بالله